Mgonjwa wa kisukari anaweza kunyonyesha?

Mgonjwa wa kisukari anaweza kunyonyesha na inashauriwa sana anyonyeshe kwasababu kuna faida nyingi za kiafya zinazopatikana kwa kunyonyesha. 

Faida ya kunyonyesha

Watoto wanaonyonyeshwa maziwa ya mama wana hatari ndogo ya kupata kisukari cha aina ya 1 na kuwa mnene kupita kiasi au kuwa mnene baadaye maishani. Pia wana uwezekano mdogo wa kuwa na magonjwa ya mzio allergies kama pumu, magonjwa ya kuambukiza.

Kunyonyesha kunaweza kupunguza hatari ya mama ya kisukari cha aina ya 2, shinikizo la damu, saratani ya matiti, saratani ya ovari, na magonjwa ya mifupa. Inaweza pia kukusaidia kupunguza uzito.

Ugonjwa wa kisukari wa ujauzito

Wakati wa ujauzito, baadhi ya wanawake huwa na viwango vya juu sana vya sukari kwenye damu ingawa hawakuwa na kisukari kabla ya kupata mimba. Hali hii huitwa inayoitwa kisukari cha ujauzito. 

Ikiwa hali hii ilikutokea, uko katika hatari kubwa ya ugonjwa wa kisukari cha aina ya 2 baadaye maishani. Lakini habari njema ni kwamba kunyonyesha kunaweza kupunguza hatari ya kupata kisukari cha aina ya pili kwa sababu husaidia mwili wako kurekebisha kiwango cha sukari na kuzalisha insulini bora.

Muda ambao unanyonyesha pia huathiri nafasi yako ya kupata kisukari cha aina ya 2. Katika utafiti mmoja, kunyonyesha kwa muda mrefu zaidi ya miezi miwili kulipunguza hatari kwa karibu nusu. Na kadiri wa mama walipozidisha muda wa kunyonyesha hatari ya kupata kisukari aina ya pili ilipungua zaidi.

Tofauti ya watoto waliozaliwa na wamama wenye kisukari

Baadhi ya watoto ambao mama zao wana kisukari au wana kisukari cha ujauzito huzaliwa wakiwa na sukari ya chini ya damu (hypoglycemia). Sukari ya chini ya damu ya mtoto mchanga mara nyingi hutibiwa vyema zaidi kwa kunyonyesha mapema na kugusa ngozi na mama.

Kama una Kisukari ufanye nini kabla hujashika mimba?

Ikiwa unaugua kisukari, ni muhimu kupata ushauri kutoka kwa daktari wako kabla ya kupata mimba. Ugonjwa wa kisukari cha ujauzito usiodhibitiwa unaweza kumuathiri mtoto wako. Kwa hivyo ni muhimu kuhakikisha unadhibiti kisukari kabla ya kupata ujauzito.

Ukiwa na kisukari cha aina 1, unaweza kuhitaji insulini kidogo katika ujauzito wa mapema lakini kisha ukahitaji zaidi katika trimester ya pili na mapema ya tatu—kwa sababu ya mabadiliko katika unyeti wa mwili wako kwa insulini.

Anayetumia dawa za kisukari anaweza kunyonyesha?

Dawa nyingi za kisukari, ikiwemo insulini na metformin, ni salama kwa mtoto. Kunyonyesha kunaweza pia kufanya sukari yako ya damu kuwa ngumu kidogo kutabiri, kwa hivyo ifuatilie kwa karibu. Hivyo ni muhimu kuwasiliana na daktari wako, kwani dozi inaweza kubadilika. 

Lishe kwa mgonjwa wa kisukari anayenyonyesha 

Mama anayenyonyesha mwenye kisukari, ni muhimu kudumisha lishe bora kwa afya ili kuhakikisha ustawi wako na wa mtoto wako. Nimekuandikia mwongozo wa kina wa kukusaidia kudhibiti lishe yako kwa ufanisi.

Panga milo yako: Panga milo yako kabla ya wakati ili kuhakikisha kuwa una mlo kamili. Mlo wako unapaswa kujumuisha aina mbalimbali za matunda, mboga mboga, nafaka nzima – ambazo hazijakobolewa, nyama ya mafuta isiyonona sana , na mafuta mazuri ya kupikia. Lenga milo mitatu na vitafunio viwili hadi vitatu kwa siku ili kuweka viwango vyako vya sukari kwenye damu kuwa thabiti.

Fuatilia kiasi cha vyakula vya wanga wako: Wanga ni chanzo kikubwa cha sukari, ambayo inaweza kuathiri viwango vya sukari yako kwenye damu. 

Epuka vyakula na vinywaji vyenye sukari nyingi: Vyakula vilivyo na sukari nyingi vinaweza kuongeza viwango vyako vya sukari kwenye damu, na kusababisha shida. 

Ongeza ulaji wako wa vyakula vyenye nyuzinyuzi/kambakamba: Nyuzinyuzi ni sehemu muhimu ya lishe yenye afya kwani husaidia kudhibiti viwango vya sukari ya damu. Vyakula kama vile mboga mboga, matunda, na nafaka nzima ni vyanzo bora vya nyuzinyuzi.

Kunywa maji ya kutosha: Kunywa maji mengi ni muhimu, haswa wakati wa kunyonyesha. Inasaidia kuondoa sumu na kurekebisha viwango vya sukari kwenye damu. Lenga angalau glasi nane za maji kwa siku. Hatahivyo kiwango cha maji kitategemea joto kwa wakati uliopo.

Kiasi: Kula kitu chochote kupita kiasi, hata vyakula vyenye afya, husababisha viwango vya juu vya sukari kwenye damu. Hakikisha unashikamana na saizi zinazopendekezwa ili kukusaidia kudhibiti viwango vyako vya sukari kwenye damu.